MÜHASİRƏNİ YARIB SİLAHDAŞLARINI XİLAS ETDİLƏR
Haqq qalib gəldi, torpaqlarımıza uzanan xain əllər kəsildi. 28 illik sıxıntılarımıza son qoyuldu. 44 günlük Vətən müharibəsi Azərbaycanın qələbəsi ilə başa çatdı.
Müzəffər Ali Baş Komandanımızın rəhbərliyi və qorxmadan düşmən üzərinə şığıyan igid əsgərlərimizin əzmkarlığı, fədakarlığı ilə qazanılan Böyük Qələbədə Famil Əlizadənin də payı var. Onun da adı Azərbaycanın, Qarabağın salnaməsinə yeni tarix yazanlar sırasındadır.
Könüllü şəhid əsgər Əlizadə Famil Habil oğlu 3 may 1999-cu ildə Masallı rayonunun Ərkivan qəsəbəsində dünyaya göz açıb. 2016-cı ildə qəsəbədəki 3 nömrəli tam orta məktəbi bitirib. Təhsilini 2 nömrəli Bakı Peşə Liseyində davam etdirib. Elektrik avadanlıqlarına xidmət və təmir üzrə elektrik mantyoru peşəsinə yiyələnib. 2017-ci ilin iyulunda SHXÇDX Masallı rayon şöbəsi tərəfindən həqiqi hərbi xidmətə çağırılıb. 2020-ci ilin yanvarında ordudan tərxis olunub.
İkinci Vətən müharibəsi başlanan gündən könüllü olaraq döyüşlərə qatılıb. Cəbhə boyu əksər döyüşlərdə qəhrəmanlıqla vuruşan Famil Əlizadə Füzuli rayonunun alınmasında, Yuxarı Əbdürrəhmanlı kəndinin işğaldan azad edilməsində xüsusi şücaət göstərib. Hər dəfə qızğın döyüşlərin önündə gedənlərdən olub Famil. Oktyabrın 21-də şəhidlik zirvəsinə yüksəlib.
Şəhid əsgər Famil Əlizadə subay idi. Ailədə bir bacı, iki qardaş olublar. Valideynləri onlara uşaq yaşlarından vətənpərvərlik ruhunu aşılayıblar. Ailənin başçısı Habilin atası Əli Rəhimov (1923-1989) İkinci Dünya Müharibəsi veteranı olub. Bu zəhmətkeş ailədə 15 uşaq böyüyüb. Habil uzun müddət Masallı Elmi-Bərpa İstehsalat Birliyində usta kimi çalışıb. Hərbi xidmətini Almaniya Demokratik Respublikasında keçib, tankçı olub. Qardaşı İxtiyar isə Əfqanıstan müharibəsi veteranıdır.
F.Əlizadənin böyük qardaşı, 26 yaşlı Qabil Azərbaycan Texniki Universitetini bitirib. İxtisasca kompüter mühəndisidir. 2015-2017-ci illər ərzində hərbi xidmətdə olub. Familin döyüş yoluna nəzər salmaqda o, mənə yardımçı oldu. Qardaşının silahdaşı Məmmədbağır Abdullayevlə vasitəsilə əlaqə saxladıq. Öyrənirik ki, sentyabrın 27-də ermənilərin təxribat hücumundan sonra Famil Əlizadə müzəffər əsgərlərimizlə birgə Füzuli istiqamətində, Kürdmahmudlu, Aşağı və Yuxarı Əbdürrəhmanlı kəndləri uğrunda döyüş əməliyyatlarında igidliklə vuruşublar.
Növbəti tapşırıq düşmənin ərzaq anbarını ələ keçirmək olub. Taqım komandiri, leytenant Elşən Məmmədov (sonradan şəhid olub) bu əməliyyata yollanacaq könüllüləri seçərkən Famil birinci olaraq önə atılıb. Oktyabrın 21-də, sübh çağından 9 nəfərlik könüllü (Məmmədbağır Abdullayev, Cavid Zeynallı, Ramin İmaməliyev, Nəcəf, Subhan, Zahir, Vüqar) dəstə əməliyyata başlayıb – postu (ərzaq anbarını) düşməndən azad edib, bayrağımızı sancıblar. Saat 11 radələrində isə təxminən 35 nəfərlik köməkçi qüvvə gəlib.
Vadafrom, Kurqan deyilən ərazidə (Yuxarı Əbdürrəhmanlı, Şiştəpəyə az qalmış) şiddətli döyüşlər aram verməyib. Ərzaq anbarını geri götürməyə cəhd edən ermənilər günorta saatlarında yenidən basqın ediblər. Çox yaxın məsafədən, dağ ətəyində yerləşən düşmən mövqelərindən qarşı tərəf ağırçaplı silahların intensiv atəşinə tutulub. Əsgərlərimiz bir müddət mühasirədə qalıb. Yalnız zabit heyəti çöldə qalaraq postu müdafiə etsələr də düşmən ciddi müqavimət göstərməyə cəhd edib. Təhlükəlidir deyibən əsgər heyətinə (təxminən 40 nəfər) anbardan çölə çıxmamaq bildirilib. Vəziyyətin anbaan gərginləşdiyini görən Famil isə mühasirəni yarmağa üstünlük verərək “biz bura döyüşməyə gəlmişik” deyə, yenidən irəli atılıb. Arxasınca bir neçə silahdaşı da çölə çıxıb. Güllə yağışı altında, açıq ərazidəki səngərdə mövqe tutan igid əsgərimiz bir neçə düşməni dəqiq atəşlə məhv etməyə müvəffəq olub. Sinəsini Vətənə sipər edən Famil qızğın döyüş zamanı qarşı tərəfin snayper gülləşinə tuş gəlib. Ondan təxminən 10 metr məsafədə olan Məmmədbağır əvvəlcə Familin qolundan yaralandığını hiss edib, yaxınlaşdıqda isə yanıldığını görüb – güllə qolunu sivirsə də ürək nahiyəsinə dəymişdi. Səngər yoldaşının qollarında son nəfəsində gülə-gülə “arzuma çatdım” deyərək əbədiyyətə qovuşub Famil.
Sonra qumbaraatanlarımız bir neçə atışla düşmənin əsas qaynar nöqtəsini darmadağın ediblər. Ermənilər xeyli sayda itki veriblər. Təxminən bir saatdan sonra isə əsgərlərimiz düşmənin munamyot atəşlərinə məruz qalıb. Şiddətli müqaviməti mərdliklə dəf edərkən taqım komandiri, 21 yaşlı leytenant Elşən Məmmədov şəhid olub. Yaralılar və iki şəhidimiz döyüş zonasından təxliyə edilib. Sonacan mübarizə əzmi göstərən hərbçilərimiz düşmənin əsas atəş nöqtələrini susdurub, işğaldan azad edilmiş postu qoruyublar.
Familin silahdaşları isə növbəti tapşırığın uğurlu icrası nəticəsində daha 5 kəndimizi düşmən əsarətindən xilas ediblər...
Şəhidin atası Habil Rəhimov deyir ki, mehriban, dosta sədaqətli, zəhmətkeş oğul idi Famil. Əsgərlikdən sonra öz ixtisası üzrə deyil, aşpaz kimi Bakıda işləməyə başladı. Son danışığımız oktyabrın 20-də, mənim ad günümdə oldu. Səhər saatlarında zəng etmişdi ki, məni təbrik etsin. Anası və qardaşı ilə də danışdı. Bizi inandırmağa çalışırdı ki, müharibədə deyilik, yeyib-içib, yatırıq. Deyirdi ki, nigaran qalmayın, əlimizdə bir-iki vacib işimiz var, onu qurtaraq, sonra rahat danışarıq. Qardaşına deyibmiş ki, hansı oğul atasının ad gününə hədiyyə olaraq torpaq alar (yəni işğaldan azad edər)?
Şükufə anası ona dediyi son sözlərini xatırlayır: ”Hər dəfə, istər evdə, ya hərbi xidmətdə olarkən onu nazlayanda deyərdi ki, ay ana, mən böyümüşəm axı. Amma axırıncı danışığımızda bunun tam əksini dedi: can, ana, nazla məni, nazla! Elə bil ürəyinə damıbmış... Yenə də Familimi nazlayıb, şumal tellərini sığallamaq, qollarımı boynuna dolamaq istərdim...”
İndi oğlunun qoxusunu almaqdan ötrü üçrəngli bayrağa bükdüyü beşiyinə, çarpayısına sarılır, portretini qucaqlayaraq beləcə nakam övladını oxşayır, ürəyini boşaldır Şükufə ana.
Məlumat üçün bildirək ki, işğalçı Ermənistan silahlı qüvvələrinin təxribatına qarşı keçirilən əks-hücum əməliyyatları zamanı şəhid olan könüllü əsgər Əlizadə Famil Habil oğlu oktyabrın 22-də, Ərkivan qəsəbəsinin Bağlakücə qəbiristanlığında torpağa tapşırılıb.
Azərbaycanın ərazi bütövlüyünün təmin edilməsi uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Respublika Silahlı Qüvvələrinin əsgəri Əlizadə Famil Habil oğlu (ölümündən sonra) "Vətən uğrunda", şəxsi igidliyi və şücaəti nümayiş etdirdiyinə görə "Füzulinin azad olunmasına görə" medalları
Bütöv Azərbaycana, doğma yurda, ailəsinə başucalığı gətirən Famil kimi qəhrəman Vətən övladları cismən bizləri tərk etsələr də ruhən yaşayırlar. Tərəddüd etmədən doğma Azərbaycan uğrunda canını fəda edən oğullarımız bir daha sübuta yetirdilər ki, Vətən borcunu ödəmək ən böyük amalımızdır.
Başını dik saxla, Habil kişi! Şəhid atası olmaq əsgər olmaqdan da qürurludur.
Başını dik saxla, Şükufə ana! İgid oğlun düşmənlərin bağrını yardı, qəhrəmanlıq tarixi yazdı. Familin və digər şəhid əsgərlərimizin qanı yerdə qalmadı, düşmənə layiqli cavab verildi. Müqəddəs bayrağımızın Şuşada və digər xilas olmuş ərazilərimizdə dalğalandığı gündən şəhidlərimizin ruhu şaddır.
Şəhidin məzarı başında canından artıq sevdiyi üçrəngli Azərbaycan bayrağı ucaldılıb. Qırmızı rəngini şəhidlərin qanından alan müqəddəs bayrağımız zirvələrdə dalğalandıqca Vətənimizin qüdrətini, Familimizin adını göylərə qaldırır.
AKİF AĞAYEV, MASALLI.
