Vaqif Qızılbaşın “Antik Teleport: Qübbədən Qaçış” adlı kitabı işıq üzü görüb.

"Leqal" xəbər verir ki, nəfis tərtibatlı, illüstrasiyalı kitab sadəcə bir roman deyil, hər şeyin zahirdə qaydasında göründüyü, amma içində çat verən bir dünyanın səssiz qışqırığıdır.

Müəllif bildirir ki, həyatın görünməyən tərəflərini sorğulayan, sadə suallardan dərin cavablar axtaran bir həyat yolçusuyam. Uzun illər boyu yazmağa deyil, yaşamağa çalışmışam. İndi isə yaşadıqlarımı yazıram – öz həqiqətimə sadiq qalaraq. Bu kitabı yazmağımın səbəbi nə şöhrət, nə də tanınmaqdır.

Bu kitab – ruhuna yön tutmaq istəyənlərə gizli bir siqnaldır. Tək bir kəlmə ilə öz içində silkələnəcək, tək bir cümlədə tanış olduğun duyğunu tapacaqsan.

Hekayə həyatla mübarizə aparan, hər şeyin mənasını axtaran, öz yerini tapmaqda çətinlik çəkən bir gəncin – İlyasın yolçuluğudur. Onun keçdiyi yollar, rastlaşdığı məxfi təşkilatlar, sirli portallar, acı həqiqətlər – əslində, bizim gündəlik həyatımızda üz-üzə gəldiyimiz sualların başqa bir formada cavabıdır.

Bəs biz kimik? Haradan gəlmişik? Və əgər yaşadığımız bu reallıq yalnız bir səthdisə, altındakı qatlarda nə gizlənir?

Roman oxucunu zaman və məkan anlayışlarının dar qəlibindən çıxarıb, insan ruhunun dərinliklərinə, həqiqət və illüziya arasındakı incə sərhədə aparır.

Bəzən xəyal etdiyimiz şeylər, reallıqdan daha doğru ola bilər. Bəzən bir medalyon, bir yuxu, bir seçim, bəzən də bir sevgi – bütün dünyanı dəyişdirə bilər.

Əsər elmi-fantastika, mistik realizm, psixoloji dram, ezoterik fəlsəfə və realist dialoqlar qarışığında yazılmışdır. Təsvir olunanlar yalnız alternativ kənar dünyanın yox, bəlkə də, oxucunun öz daxili aləminin güzgüsüdür.

Əgər sən də həyatın dərinliklərini düşünən, görünməyənin içində gerçək axtaranlardansansa, bu hekayə sənin öz içinə olan səfərin ilk addımı ola bilər...

Qeyd edək ki, kitab naşirin ilham qaynağı “bermud üçbucağı” (sahib olduğu dəyərlər, oxuduğu seçmə kitablar və ibrətamiz filmlər) olan şəxsin gələcəyin dünyası haqqındakı xəyalının məhsuludur.

Kitabda qeyd olunan xüsusi isimlər, xarakterlər, məkanlar, ədədlər simvolik təsvir üçün seçilmiş və nəzəriyyə kimi qavrayacağınız fikirlər isə söz çatdırmaqda uyğun vasitə olsun deyə şəxsi araşdırma nəticəsində qələmə alınmışdır.

Bu kitab dünyanın gözəl şəkildə dəyişəcəyini xəyal edib, özü ilə məşğul olanlara həsr olunur. Daha çox isə bu xəyalın fərqində olmayanlara...