2020-ci il bütün dünyada olduğu kimi, ölkəmiz üçün də gözlənilməz hadisələrlə yadda qaldı. Azərbaycan Gimnastika Federasiyasının (AGF) aktiv fəaliyyəti yenidən Beynəlxalq Gimnastika Federasiyası (FIG) tərəfindən yüksək qiymətləndirildi. Ötən ilin nəticələrinə əsasən AGF bir daha “Mükafatlandırılan federasiyalar”ın siyahısında birinci oldu. AGF altı il ərzində - 2014-2019-cu illərdə ardıcıl olaraq FIG-in 10 ən güclü federasiyalarının siyahısında yer alıb, son üç ildə isə həmin siyahıya liderlik edib.

AGF-dən LEQAL.AZ-a bildiriblər ki, yola saldığımız 2020-ci ilin gimnastika təqvimi bir sıra yarışlar və tədbirlərlə zəngin olsa da, dünyanı bürümüş COVID-19 pandemiyası səbəbindən həmin turnirlərin bir çoxu ləğv edildi və ya təxirə salındı. Bütün idman ictimaiyyətinin səbirsizliklə gözlədiyi Olimpiya Oyunları belə növbəti ilə keçirildi.

Pandemiya AGF-in fəaliyyətindən də təsirsiz ötüşmədi. Belə ki, federasiyasının təşkil edəcəyi bir beynəlxalq yarış ləğv edildi, dünya çempionatı da daxil üç yarış təxirə salındı, iki Avropa birinciliyinin keçirilməsi isə Bakıdan digər ölkəyə köçürüldü.

Bütün bunlara baxmayaraq, Milli Gimnastika Arenası (MGA) ilin əvvəlində 3 yarışa ev sahibliyi etməyə nail oldu. İlk olaraq, batutçular Olimpiya Oyunlarına təsnifat xarakterli dünya kubokunda iştirak etmək üçün ölkəmizin paytaxtına təşrif buyurdular. Daha sonra gənc kişi idman gimnastları MGA-da 1-ci “AGF Junior Trophy” turnirində mübarizə apardılar. Azərbaycan təmsilçiləri bu yarışda fərqlənməyi bacararaq yığma komandamızın hesabına 2 gümüş və 1 bürünc medal yazdırdılar.

Bunun ardınca ölkəmizdə Olimpiadaya lisenziya xarakterli daha bir yarış – idman gimnastikası üzrə dünya kuboku təşkil edildi. Lakin koronavirus pandemiyası ilə əlaqədar Azərbaycanda qəbul edilmiş təxirəsalınmaz qabaqlayıcı tədbirlərlə bağlı bu kubokun final mərhələləri ləğv olundu. Təsnifat mərhələsində idmançıların qazandıqları xalların final nəticələri kimi qəbul olunduğu bu yarışda qadın idman gimnastımız Marina Nekrasova bürünc medal əldə etdi.

2020-ci ildə gimnastlarımız üçün ən uğurlu hadisə Ukraynada təşkil edilmiş bədii gimnastika üzrə Avropa çempionatında iştirak oldu. Bədii gimnastlarımız bu yarışda üçqat uğura imza atdılar. Zeynəb Hümmətova, Darya Sorokina, Məryəm Səfərova, Ləman Əlimuradova və Yelizaveta Luzandan ibarət qrup hərəkətləri komandamız çoxnövçülükdə gümüş medala layiq görüldülər. Bu medal Azərbaycanın bədii gimnastika tarixində qrupumuzun çoxnövçülükdə qazandığı ilk medaldır. Daha bir medalı – bürüncü istedadlı qrup komandamız 3 halqa və 2 cüt gürzlə final çıxışlarına görə əldə etdi. Növbəti medal isə komanda hesabında qazanıldı. Qrup və gənc gimnastlarımızın (Nərmin Bayramova, Alina Gözəlova, İlona Zeynalova, Leyli Ağazadə) topladıqları xalların cəminə əsasən bu proqram üzrə də bürünc medal əldə olundu.

Yığma komanda üzvlərimizin çempionatda çıxışları zamanı istifadə etdikləri geyimlər isə azarkeşlər, gimnastika mütəxəssisləri, eləcə də dünya mediası daxil hər kəsin diqqətini cəlb etdi və uzun müddət sosial şəbəkələrdə geniş müzakirə olundu.

Martdan etibarən bir çox ölkələrdə olduğu kimi, Azərbaycanda da karantin rejimi elan edildi. Karantin dövründə bir sıra kütləvi tədbirlərlə yanaşı idman yarışlarının da keçirilməsi, o cümlədən idman zallarında məşqlər qadağan olundu. Buna baxmayaraq, karantin dövründə sağlamlığı qorumaq, immuniteti gücləndirmək və səhhəti gümrah saxlamaq üçün əhaliyə gündəlik idmanla məşğul olmaq, fiziki aktiv olmaq tövsiyə olundu. AGF də bunu nəzərə alaraq bir sıra layihələr həyata keçirdi. İnsanların öz evində rahat idman etmələri üçün hər gün peşəkar məşqçilər tərəfindən səhər gimnastikası təqdim edildi və hamıya əlçatan olması üçün federasiyanın sosial şəbəkə hesablarında yayımlandı. Bundan əlavə səhər gimnastikası yerli TV kanalla əməkdaşlıq çərçivəsində televiziya vasitəsi ilə də geniş əhali kütləsinə təqdim edildi. AGF, həmçinin əhalinin gimnastika ilə düzgün şəkildə məşğul olaraq sağlam qalması üçün vaxtaşırı maarifləndirici videoçarxlar də hazırlayaraq, sosial şəbəkə hesablarında paylaşır.

Karantində idman zalları bağlı olsa da, gimnastlarımız məşqlərini evdə davam etdirdilər. Gimnastlarımızla çalışan məşqçilər və xoreoqraflar isə daim onların məşqlərini nəzarətdə saxlayaraq, evdə məşq zamanı fiziki formalarını qorumaları üçün müntəzəm olaraq məsləhətlər verirdilər. Gimnastlar onlayn yarışlarda iştirak edərək, mükafatçılar sırasına daxil olmağı da bacarıblar.

Evdə onlayn təlimlər keçdikləri müddətdə gimnastika növlərinin nümayəndələri bir sıra maraqlı və əyləncəli onlayn müsabiqə və “challenge”lərdə iştirak ediblər, həmçinin, özləri də kreativ təşəbbüslərlə çıxış ediblər.

Karantin günlərinin davam etdiyi bir dövrdə xarici ölkələrin gimnastları üçün onlayn ustad dərsləri də təşkil edilib. Bu cür təlimlər məşqçi və xoreoqraflarla yanaşı bədii gimnastika üzrə yığmanın gimnastları tərəfindən də keçirilib. Bu ustad dərslərindən Polşa, Slovakiya, Latviya, Hindistan, Misir, Braziliya, Monteneqro, Meksika, Argentina, Filippin və bir sıra digər ölkə təmsilçiləri faydalanıblar.

Bu müddətdə Azərbaycan və İsrailin bədii gimnastika üzrə yığma komandalarının çox maraqlı ilk birgə onlayn yarışması baş tutdu. “Battle” adlanan bu yarışda hər iki ölkənin “Tokio-2020” Olimpiadasına lisenziya qazanmış komandaları iştirak ediblər. Yarışın məqsədi karantin günlərinin davam etdiyi və gimnastika yarışlarının olmadığı bir zamanda gimnastlara yarış əhval-ruhiyyəsini yenidən yaşatmaq, onlayn da olsa, birgə maraqlı vaxt keçirərək əylənmək idi.

AGF hər zaman olduğu kimi bu il də məşqçi və hakimlərin ixtisaslarının artırılmasını diqqətdə saxlayıb. Belə ki, ilin əvvəllərində yerli hakim və məşqçilər üçün gimnastika növləri üzrə kurslar təşkil edilib.

Bundan başqa, Azərbaycanın “TeamGym” üzrə hakimləri Avropa dərəcələrini artırıblar. İyulun sonlarında keçirilmiş bu növ üzrə onlayn hakimlik imtahanlarında iştirak edən təmsilçilərimiz İnara İsrafilbəyova və Akif Kərimli 3-cü hakimlik dərəcəsinə kimi yüksəliblər.

AGF tərəfindən bu il həm də ilk dəfə “Gimnastika hamı üçün” növünə aid məlumat xarakterli vebinar təşkil olunub. Gimnastika mütəxəssislərinin və bu gimnastika növü ilə tanış olmaq istəyən şəxslərin böyük marağına səbəb olmuş vebinarda iştirak üçün ümumilikdə 84 nəfər qeydiyyatdan keçib. İştirakçılar arasında ölkənin müxtəlif şəhər və rayonları - Qax, Zaqatala, Balakən, Qusar, Şirvan, Gəncə, Lənkəran, Mingəçevir, Naxçıvan və digər bölgələrdən olan təmsilçilər yer alıb.

Yola saldığımız il bütün dünya ölkələri üçün olduğu kimi, Azərbaycan üçün də fərqli bir il oldu. Qarşıya çıxmış müəyyən məhdudiyyətlər və çətinliklərə baxmayaraq, bu ildə federasiya bir sıra yenilikləri də sınaqdan keçirdi və yeni bacarıqlar əldə etdi. Qarşıda isə bizi mühüm gimnastika tədbirləri ilə zəngin yeni bir il gözləyir. Azərbaycan Gimnastika Federasiyası növbəti ildə hər kəsə möhkəm sağlamlıq, işlərində uğurlar arzu edir.