Ailə həyatı quran qazimizin sosial şəbəkələrdə fotoları yayılıb. Vətən müharibəsi zamanı döyüşlərin birində sol ayağını itirən qazi nişanlısı ilə ötən gün qeydiyyat şöbəsində nikah bağlayıb və bu xoş anın fotoları qısa müddətdə sosial şəbəkələrin, necə deyərlər, bəzəyinə çevrildi.

LEQAL.AZ xəbər verir ki, qazi Abbas Yusifov Qazax rayonunun Ermənistanla sərhəddə yerləşən Aslanbəyli kəndində yaşayır. Onun uşaqlığı elə bu sərhəd kəndində erməni gülləsi altında hərbçilərin əhatəsində keçib.

“Hərb sənətinə marağım uşaq vaxtlarımdan var idi. Ermənilərin vəhşiliyini, müharibə kadrlarını televiziyalarda görürdüm. Kəndimizdə atışma da olurdu, bu da məni narahat edirdi. Elə o vaxtdan düşməndən qisas almaq hissi ilə böyümüşəm”, - deyə qazimiz bildirib.

Abbas Tərtərdə, Suqovuşanda döyüşüb. Sentyabrın 30-da isə düşmənin basdırdığı minaya düşərək ayağından ağır xəsarət alıb.

Xalq-ordu birliyindən qürur duyduğunu deyən leytenant ayağını itirdiyinə görə yox, qələbə gününə qədər döyüşlərdə iştirak edə bilmədiyinə görə heyfslənir. O ki qaldi ailə həyatı qurmasına, Abbas hərbi xidmətdə olduğu zaman nişanlı idi. Ötən gün isə onun yolunu gözləyən qızla evlənib. Bu gün təbii ki, onun sevincinin həddi-hüdudu yoxdur.

Gələcəyə nikbin baxan qazimizin həyata keçiriləcək çox planı var. “Şükür Allaha, ayağımı itirməyim mənə ciddi problem yaratmır. Mülki həyatımda elə də çətinlik çəkmirəm. Döyüşlərdən qabaq, hərbiçi olandan nişanlı idim. 2017-ci ildə tanış olmuşuq. Sevdiyim xanım öz kəndçimdir. 2019-cu ildə isə nişanlanmışıq. Cəbhədə olanda əlaqə saxlayırdım. Bilirdim ki, nişanlım məni heç vaxt atmaz. Evliliyimiz indiki vaxta, qazi olduğum dövrə təsadüf etdi. Mənə istər öz ailəm, istərsə də yoldaşımın ailəsi dəstək oldu. Ayağımın birini itirdiyimi mənə hiss etdirmədilər”, –deyə Abbas bildirib.

Qazimizin indi bir istəyi var. O, protez ayaq qoyulduqdan sonra yenidən hərbi xidmətini davam etdirmək, bacardığı mümkün işlərdə çalışmaq arzusundadır.

Qeyd edək ki Abbas Yusifov 3-cü dərəcəli “Vətənə xidmətə görə” ordeni ilə təltif olunub.