Daha bir həkimin əməliyyat zamanı çəkdiyi videogörüntü sosial şəbəkələrdə geniş müzakirələrə səbəb olub. Videoda həkimin maskasız, mahnı sədası altında oynayaraq, arada əlcəyinə öskürdüyü, pasiyentdən bu şəkildə biopsiya nümunəsi götürdüyü əks olunub.

“Qafqazinfo”nun məlumatına görə, video sosial şəbəkələrdə yayılıb və həkimin əməliyyat zamanı davranışı birmənalı qarşılanmayıb.

Prosesin qeyri-steril mühitdə aparıldığını bildirənlər də olub.

Görüntülərin Azərbaycan Tibb Universitetinin Şüa diaqnostikası və şüa terapiyası kafedrasının müəllimi Günel Qəmbərovaya aid olduğu iddia edilir.

Radioloq-mamoloq kimi tanınan Günel Qəmbərova əməliyyat zamanı edilən çəkilişin pasiyentin istəyi ilə gerçəkləşdirildiyini iddia edib. O, artıq Tibb Universitretində işləmədiyini bildirib.

G.Qəmbərova yayılan videodan sonra ona müraciətlərin sayının artdığını iddia edib. 

“Dünənin uşağı deyiləm, beynəlxalq təcrübəm var”, - deyən G.Qəmbərova Azərbaycandan ABŞ-yə gedən ilk radioloq olduğunu əlavə edib.

Səhiyyə Nazirliyi Analitik Ekspertiza Mərkəzindən bildirilib ki, paytaxtdakı özəl hospitallardan birində Günel Qəmbərovanın cərrahi əməliyyat zamanı canlı yayım açması və videoçəkiliş etməsi, hansı ixtisasa malik olması ilə bağlı məsələ Səhiyyə Nazirliyində xüsusi yaradılan işçi qrup tərəfindən mövcud qanunvericiliyə uyğun şəkildə araşdırılacaq:

“Tibb müəssisələrində sanitariya-gigiyena və infeksiyadan qorunma qaydalarına əməl olunması qanunla müəyyən edilmiş tələblərdəndir. Əməliyyat zamanı çəkilişin aparılması yalnız elmi-tədris məqsədi ilə, cərrahiyyə otaqlarında gigiyenik normalara və texniki tələblərə uyğun şəkildə həyata keçirilə bilər. Əks halda, bu, infeksiya yayılması və sanitar qaydaların pozulması riski yaradır”.

O da bildirilib ki, qeyd olunan davranış, yəni əməliyyat zamanı həkimin sosial şəbəkələrdə canlı yayım etməsi həm “Həkimlərin etik davranış qaydaları”na, həm də reklam və şəxsi maraqların təbliği ilə bağlı qanunvericiliyə ziddir. 

Daha ətraflı “Xəzər” TV-nin videomaterialında: