Azərbaycan və Gürcüstan arasında münasibətlər təkcə qonşuluq prinsipləri üzərində deyil, həm də dərin tarixi, iqtisadi, siyasi və mədəni bağlar əsasında qurulub. İki ölkə arasında dostluq və əməkdaşlıq münasibətləri zaman keçdikcə daha da dərinləşərək, regional və beynəlxalq səviyyədə strateji tərəfdaşlıq xarakteri alıb. Bu gün Gürcüstanla əlaqələr Azərbaycan üçün yalnız iqtisadi fayda və tranzit imkanları ilə ölçülmür, eyni zamanda regionun təhlükəsizliyi, enerji təhlükəsizliyi, nəqliyyat dəhlizlərinin inkişafı və ümumiyyətlə, Cənubi Qafqazın gələcəyi baxımından həyati önəm daşıyır.
Azərbaycan və Gürcüstan arasındakı münasibətlər tarixi köklərə dayanır. Qədim İpək Yolunun əsas qovşaqlarından biri kimi hər iki ölkə əsrlər boyu ticarət, mədəniyyət və sivilizasiya körpüsünün bir parçası olublar. Bu qarşılıqlı əlaqələr müasir dövrdə də yeni nəfəs alaraq davam edir və hər iki xalq arasında dostluq və qarşılıqlı hörmət ruhunu gücləndirir.
Azərbaycan və Gürcüstan beynəlxalq arenada bir-birinin əsas tərəfdaşı kimi çıxış edir. Gürcüstan Azərbaycanın ərazi bütövlüyünü dəstəkləyir və Qarabağ məsələsində Azərbaycanın haqlı mövqeyini müdafiə edən dövlətlərdən biridir. Eyni zamanda, Azərbaycan da Gürcüstanın ərazi bütövlüyünə və suverenliyinə sadiqdir, Cənubi Osetiya və Abxaziya məsələsində Gürcüstanın mövqeyini dəstəkləyir.
İki ölkə arasında yüksək səviyyəli siyasi dialoq daim davam edir. Prezidentlər, baş nazirlər və digər dövlət rəsmiləri mütəmadi olaraq qarşılıqlı səfərlər edir, müxtəlif beynəlxalq forumlarda birgə çıxışlar edirlər. Bu da iki dövlət arasında etimada əsaslanan münasibətlərin nə qədər dərin olduğunu bir daha təsdiq edir.
Azərbaycan Gürcüstan üçün əsas enerji təchizatçısıdır. Gürcüstan Azərbaycan nefti və təbii qazı hesabına öz enerji təhlükəsizliyini təmin edir. Bakı-Tbilisi-Ceyhan (BTC) neft kəməri və Bakı-Tbilisi-Ərzurum qaz boru xətti regionda enerji təhlükəsizliyinin əsas dayaqlarındandır.
Eyni zamanda, Azərbaycan vasitəsilə Gürcüstan Avropaya enerji ixrac imkanları əldə edir. Bu isə Gürcüstan üçün yalnız iqtisadi deyil, siyasi baxımdan da böyük üstünlüklər yaradır. Azərbaycan-Gürcüstan-Türkiyə enerji əməkdaşlığı regional inteqrasiyanın və enerji təhlükəsizliyinin vacib komponentlərindən biridir.
Azərbaycan və Gürcüstan Avrasiyanı birləşdirən strateji nəqliyyat dəhlizlərinin əsas iştirakçılarıdır. Bakı-Tbilisi-Qars (BTQ) dəmir yolu layihəsi Asiyanı Avropa ilə birləşdirən mühüm infrastruktur layihəsidir. Bu layihə sayəsində Azərbaycan və Gürcüstan beynəlxalq yükdaşımalarında vacib tranzit ölkələrə çevriliblər.
Bundan əlavə, Transxəzər Beynəlxalq Nəqliyyat Marşrutu (Orta Dəhliz) çərçivəsində əməkdaşlıq iki ölkənin nəqliyyat-logistika imkanlarını daha da genişləndirir. Bu, təkcə iqtisadi mənfəət gətirmir, həm də Azərbaycan və Gürcüstanın geosiyasi əhəmiyyətini artırır.
Azərbaycan və Gürcüstan arasında iqtisadi əməkdaşlıq dinamik şəkildə inkişaf edir. Azərbaycanın Gürcüstanda sərmayələrinin həcmi yüz milyonlarla dollara çatır. Xüsusilə enerji, tikinti, bank sektoru və telekommunikasiya sahələrində Azərbaycan şirkətləri Gürcüstan iqtisadiyyatında aktiv iştirak edirlər.
Ticarət dövriyyəsi də ildən-ilə artır. Azərbaycan Gürcüstanın əsas ticarət tərəfdaşlarından biridir. 2024-cü ilin nəticələrinə əsasən, Azərbaycan Gürcüstanın xarici ticarətində ilk üçlükdə qərarlaşıb. Azərbaycan məhsulları Gürcüstan bazarında geniş yer tutur, Gürcüstan məhsulları isə Azərbaycan bazarında öz yerini tapıb.
İki ölkə arasında mədəni və humanitar əlaqələr də mühüm yer tutur. Hər il müxtəlif mədəni tədbirlər, festivallar, sərgilər keçirilir. Azərbaycan və Gürcüstan universitetləri arasında əməkdaşlıq mövcuddur, tələbə mübadilələri həyata keçirilir.
Gürcüstanda böyük Azərbaycan icması, Azərbaycanda isə gürcü icması fəaliyyət göstərir. Hər iki dövlət diasporların fəaliyyətini dəstəkləyir, onların cəmiyyətə inteqrasiyasını və hüquqlarının müdafiəsini təmin edir. Bu amil iki xalq arasında dostluq münasibətlərinin daha da möhkəmlənməsinə xidmət edir.
Azərbaycan və Gürcüstan regional təhlükəsizliyin qorunması istiqamətində də əməkdaşlıq edir. Hər iki ölkə sərhəd təhlükəsizliyi, terrorizmlə mübarizə və digər çağırışlara qarşı birgə tədbirlər həyata keçirir. NATO və digər beynəlxalq təşkilatlarla əməkdaşlıq çərçivəsində təcrübə və informasiya mübadiləsi aparılır. Azərbaycan-Gürcüstan-Türkiyə üçtərəfli formatı isə regionda təhlükəsizliyin və sabitliyin təmin edilməsində mühüm platformalardan biridir. Bu format çərçivəsində keçirilən birgə hərbi təlimlər və təhlükəsizlik üzrə görüşlər regionun müdafiə qabiliyyətini gücləndirir.Azərbaycan-Gürcüstan əlaqələri təkcə iki ölkənin deyil, bütövlükdə regionun gələcəyi üçün strateji əhəmiyyət kəsb edir. Bu münasibətlər qarşılıqlı hörmət, etibar və ortaq maraqlara əsaslanır. Azərbaycanın Gürcüstanla münasibətlərə verdiyi önəm, regionda sülhün və sabitliyin təmin edilməsi, enerji təhlükəsizliyi, nəqliyyat-logistika imkanlarının genişləndirilməsi və xalqlar arasında dostluğun möhkəmləndirilməsi baxımından əvəzsizdir. Gürcüstanla sıx əməkdaşlıq Azərbaycan üçün gələcəyə inamla baxmaq üçün mühüm bir dayağa çevrilib. Bu əlaqələrin daha da dərinləşdirilməsi regionun inkişafına, xalqlarımızın rifahına və ümumilikdə Cənubi Qafqazın sülh və sabitlik məkanına çevrilməsinə töhfə verəcəkdir.
Musalı Süleyman,
Yap Masallı rayon Təşkilatının fəal üzvü
