Dini Qurumlarla İş üzrə Dövlət Komitəsinin sədri Ramin Məmmədov oktyabrın 15-də Türkiyə Cümhuriyyəti İbn Xaldun Universitetinin Himayəçilər Şurasının sədri İrfan Gündüz ilə görüşüb.

Görüş zamanı Dövlət Komitəsinin sədri iki ölkə arasında qarşılıqlı etimada əsaslanan münasibətlərdən bəhs edərək, Azərbaycan və Türkiyəni qardaşlıq əlaqələrinin inkişafına yönəlmiş iradə və əzmkarlığın  birləşdirdiyini qeyd edib.

Komitə sədri Prezident cənab İlham Əliyevin məqsədyönlü siyasəti nəticəsində dinlərarası dialoqu və İslam həmrəyliyini dəstəkləyən, bu prosesdə aktiv iştirak edən Azərbaycanın nümunəvi təcrübəsinin önəmi barədə danışıb.  Bildirib ki, ölkəmizdə milli-mənəvi dəyərlərimizin təbliği istiqamətində uğurlu işlər həyata keçirilir. Azərbaycanda milli-mənəvi irsə, dini dəyərlərə ehtiram mövcuddur, mədəniyyətlər dialoqun inkişafı, tolerantlıq ənənələrinin möhkəmləndirilməsi dövlət siyasətinin prioritet istiqamətlərini təşkil edir.

İbn Xaldun Universitetinin Himayəçilər Şurasının sədri İrfan Gündüz Azərbaycanın birgəyaşayış mühitinin qorunub-saxlanılmasına göstərdiyi diqqəti, dinlər arasında ünsiyyət platformasının daha da dərinləşdirilməsi istiqamətindəki töhfələrini qeyd edib. Qonaq, həmçinin gənc nəslin mənəvi, əxlaqi dəyərlər ruhunda tərbiyəsinin önəmindən danışıb.

Görüşdə, eyni zamanda Gəncliyə Yardım Fondunun prezidenti Əhməd Tecim, Almaniya yığmasının Türkiyə əsilli sabiq üzvü, dünya çempionu Məsud Özil, Erkam Radio-Tv yayım şirkətinin direktoru Murat Karaman iştirak ediblər.