Rəşadətli Azərbaycan Ordusunun cəbhədəki uğurlu əməliyyatları, torpaqlarımızın ard-arda işğaldan azad edilməsi vətəndaşlarımızda, xaricdə yaşayan soydaşlarımızda, eləcə də bir sıra ölkələrin vətəndaşlarında böyük sevinc hissi yaradır. Onlar dövlətimizin başçısı, müzəffər Ali Baş Komandan İlham Əliyevə ünvanladıqları məktublarda bu sevinc hisslərini bölüşürlər.

LEQAL.AZ  Prezidentin saytına istinadla həmin məktubların daha bir neçəsini təqdim edir.

Hörmətli cənab Prezident.

Bizim hamımız Azərbaycan vətəndaşı olaraq, əldə etdiyimiz qələbələrdən fərəh, sevinc və qürur hissləri keçiririk. On illiklərlə gözlədiyimiz günlər nəhayət ki, gəlib çatdı.

Müzəffər Ali Baş Komandan, inanırıq kı, Sizin rəhbərliyiniz altında rəşadətli Azərbaycan Ordusu işğal altında olan bütün torpaqlarımızı tamamilə azad edəcək və üçrəngli Bayrağımız həmin torpaqlarımızda dalğalanacaq.

Cənab Prezident, hər zaman Sizinləyik və Sizi əmin etmək istərdik ki, göstəriş verdiyiniz halda hamımız bir nəfər kimi cəbhəyə yollanıb, işğal altında olan digər bölgələrimizi də düşməndən təmizləməyə hər an hazırıq. Allah Sizi və rəşadətli Ordumuzu qorusun! Yaşasın Azərbaycan! Qarabağ Azərbaycandır!

Böyük hörmətlə,

Rasim İbrahimov adına 131 nömrəli tam orta məktəbin kollektivi