Türkiyənin xarici işlər naziri Mövlud Çavuşoğlunun Qırğızıstana səfərinin yekunları ilə bağlı mətbuat konfransı keçirilib.

LEQAL.AZ Qırğızıstan Xarici İşlər Nazirliyinin mətbuat xidmətinə istinadla xəbər verir ki, jurnalistlərin suallarına Mövlud Çavuşoğlu və qırğız həmkarı Ruslan Kazakbayev cavab verib.

Hər iki nazir səfərin əhəmiyyəti haqqında söz açıb, səmərəli danışıqlar aparıldığını bildiriblər.

Ruslan Kazakbayev deyib ki, danışıqlarda ölkələr arasında ticari-iqtisadi sahədə əməkdaşlığın dərinləşdirilməsinə xüsusi diqqət yetirilib. Türkiyə tərəfi Qırğızıstan-Türkiyə İnvestisiya Fondunun yaradılması təklifini irəli sürüb. Qırğızıstan, Rusiya və Macarıstan arasında artıq belə bir fond yaradılıb və uğurla fəaliyyət göstərir. Biz Türkiyə ilə əmtəə mübadiləsini 1 milyard dollara çatdırmağı qərara almışıq.

Mövlud Çavuşoğlu qeyd edib ki, ticarət, nəqliyyat və loqistika sahələrində maneələr aradan qaldırılmalıdır. Qırğızıstanda və Türkiyədə logistik mərkəzlər qurulmalı, Qırğızıstandan Azərbaycana nəqliyyat dəhliz yaradılmalıdır. Sonra isə Qırğızıstandan mallar Azərbaycan vasitəsi ilə rahat şəkildə Gürcüstan, Türkiyə və Avropaya göndərilə bilər. Türkiyənin xarici işlər naziri təklif edib ki, bu tip layihələri reallaşdırmaq lazımdır.

Ruslan Kazakbayev bildirib ki, Qırğızıstan Prezidenti Sadır Japarovun Türkiyəyə rəsmi səfəri hazırlanır. Səfər müddətində 8-9 sənədin imzalanması gözlənilir. Bu səfər əlaqələrin daha da dərinləşməsinə təkan olacaq.