Finlandiyada Rusiya ilə sərhəddə hasarın tikintisinə başlanılıb.

Bildirilir ki, İmatra sərhəd-keçid məntəqəsinin hər iki tərəfindəki ağaclar artıq çıxarılır. Burada ilk olaraq sınaq hasarı deyilən hissənin üç kilometrlik hissəsi tikiləcək. Hökumət hasarın qış şaxtalarına, qar yükü və şərqdən gələ biləcək insan kütləsinə nə dərəcədə davamlı olduğunu yoxlayacaq.

Pilot hasarın iyunun sonunadək hazır olacağı gözlənilir. İmatradakı sınaq hasarının 6 milyon avroya başa gələcəyi ehtimal edilir.

Hündürlüyü üç metr olan tikanlı məftillərlə çəkilmiş sınaq hasarı ən vacib ərazilərdə gecə videomüşahidə, projektorlar və dinamiklərlə təmin olunacaq.

Sərhəd hasarının ümumi uzunluğu 200 km (təxminən 1,3 min km olan Finlandiya-Rusiya sərhədinin 15%-i) təşkil edəcək. Hasarın inşasının 2025-26-cı illərdə başa çatdırılması gözlənilir. Onun dəyəri 380 milyon avro olacaq.

Mənbə: İnterfaks