Türkiyə Elmi və Texnoloji Tədqiqat Şurasının (TÜBİTAK) rəhbəri, professor Hasan Mandal AMEA-nın prezidenti, akademik İsa Həbibbəyliyə təşəkkür məktubu ünvanlayıb.

Məktubda deyilir:

“26 iyul 2023-cü il tarixli xoş məktubunuzla bağlı, ilk növbədə, mənə və təşkilatımıza səmimi təbriklərinizə görə təşəkkürümü bildirirəm.

Vurğuladığınız kimi, təşkilatımızın 60 illik yubileyi qeyd olunur. Bu çərçivədə Türkiyənin elm və texnologiya sahəsinin ən mühüm aktorlarından biri olan TÜBİTAK son illərdə böyük uğurlara imza atıb və beynəlxalq platformalarda əldə etdiyi sanballı mövqeyə malikdir.

Milli platformada müsbət irəliləyişlərlə yanaşı, beynəlxalq fəaliyyətimiz də təşkilatımızın hazırkı mövqeyə çatmasına mühüm töhfə verib. Bu kontekstdə uzun tarixə malik Azərbaycan Milli Elmlər Akademiyası ilə qurduğumuz sıx əməkdaşlıq qurumumuzun bilik və təcrübəsini daha da artırmağa imkan verib. Müxtəlif əməkdaşlıq formalarından istifadə etməklə bu əlaqələrin daha da dərinləşdirilməsi prioritet məqsədlərimizdən biridir.

Xoş düşüncələrinizə və təbrik məktubunuza görə Sizə bir daha təşəkkür edir, Sizə və dəyərli Akademiyanıza uğurlar arzulayıram.

Prof., Dr. Hasan Mandal”.

Qeyd edək ki, Azərbaycan Milli Elmlər Akademiyasının prezidenti, akademik İsa Həbibbəyli Türkiyə Cümhuriyyətinin Elmi və Texnoloji Tədqiqat Şurasının (TÜBİTAK) yaranmasının 60 illiyi münasibətilə ötən ay qurumun rəhbəri, professor Hasan Mandala təbrik məktubu ünvanlamışdı.