Oktyabrın 19-da Masallı rayonunun Ərkivan qəsəbəsində Vətən müharibəsi şəhidi Famil Əlizadənin adına tikilən xatirə bulağının açılışı olub.

Tədbirdə Masallı Rayon İcra Hakimiyyətinin başçısı Şahin Məmmədov, hüquq- mühafizə orqanlarının rəhbərləri, şəhid ailələri, qazilər, qəsəbə sakinləri və ictimaiyyət nümayəndələri iştirak ediblər.

Əvvəlcə torpaqlarımızın işğaldan azad edilməsi naminə canlarını qurban vermiş şəhidlərimizin əziz xatirəsi bir dəqiqəlik sükutla yad edilib.

Açılış mərasimində rayon icra hakimiyyətinin başçısı Şahin Məmmədov çıxış edərək bildirib ki, Müzəffər Ali Baş Komandanımız cənab İlham Əliyevin rəhbərliyi, rəşadətli Ordumuzun qüdrəti, dəmir yumruqlu oğullarımızın  qəhrəmanlığı sayəsində 30 ildir ki, düşmən tapdağında olan torpaqlarımız işğaldan təmizləndi: “Hər bir şəhid adı bizim üçün əzizdir, müqəddəsdir. Famil təkcə Habilin deyil, hər birimizin sevimlisi, fəxridir. Bu ailənin acısı hamımızın acısıdır. Təsəlli tapırıq ki, Famil kimi igidlərimiz torpaq uğrunda canlarını fəda etdilər, doğma yurda layiqli övlad olmağı bacardılar. Bu cür oğullar Masallıda az deyil. Bütün şəhidlərimizin ruhu qarşısında baş əyir, Vətənə sipər qəhrəmanlar böyüdən valideynlərə - övladının tabutunu çiyninə alan, qürurla “oğlum, südüm sənə halal olsun!” deyən analara, hərbi geyimdə qardaşını, həyat yoldaşını son mənzilə yola salan xanımlara başınızı dik tutun, deyirəm...”  

Cəsur əsgərimiz Famil Əlizadənin Vətən uğrunda göstərdiyi şücaətdən danışan Ərkivan qəsəbə 3 saylı tam orta məktəbinin direktoru Rahib Babayev, Qafqaz Müsəlmanları İdarəsinin Masallı rayonu üzrə qazısı Rəşid Talıbov və başqaları qeyd ediblər ki, xalqımız heç bir vaxt öz igid qəhrəmanlarını unutmayacaq.

Şəhidin atası Habil Rəhimov onlara göstərilən diqqət və qayğıya görə ölkə başçısına, Mehriban xanım Əliyevaya, eləcə də rayon rəhbərinə öz dərin minnətdarlığını bildirib.

Sonra xatirə-komleksinin açılışı olub, bulaq üzərinə gül dəstələri düzülüb, şəhidin əziz xatirəsi ehtiramla yad edilib.

Məlumat üçün bildirək ki, Famil Habil oğlu Əlizadə 3 may 1999-cu ildə Masallı rayonunun Ərkivan qəsəbəsində dünyaya göz açıb. 2016-cı ildə Ərkivan qəsəbə 3 nömrəli tam orta məktəbini bitirib. Təhsilini 2 nömrəli Bakı Peşə Liseyində davam etdirib. Elektrik avadanlıqlarına xidmət və təmiri üzrə elektrik mantyoru peşəsinə yiyələnib. 2017-ci ilin iyulunda SHXÇDX Masallı rayon şöbəsi tərəfindən hərbi xidmətə çağırılıb. 2019-cu ilin yanvarında ordudan tərxis olunub.

Famil Əlizadə Vətən müharibəsi başlanan gündən könüllü olaraq döyüşlərə qatılıb. Cəbhə boyu əksər döyüşlərdə qəhrəmanlıqla vuruşan Azərbaycan Ordusunun könüllü əsgəri F.Əlizadə Füzuli rayonu uğrunda gedən döyüşlərdə fəal iştirak edib. Yuxarı Əbdürrəhmanlı kəndinin işğaldan azad edilməsində şücaət göstərərək şəhidlik zirvəsinə yüksəlib. Subay idi. 2020-ci ilin oktyabrın 22-də, Ərkivan qəsəbəsinin Bağlakücə qəbiristalığında torpağa tapşırılıb.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş qapşırıqların icrası zamanı vəzifə borcunu şərəflə yerinə yetirdiyinə, şəxsi igidliyi və şücaəti nümayiş etdirdiyinə görə Azərbaycan Respublikasının Prezidenti İlham Əliyevin müvafiq Sərəncamlarına əsasən Famil Əlizadə ölümündən sonra «Vətən uğrunda», ”Füzulinin azad olunmasına görə” və “Xocavəndin azad olunmasına görə” medalları ilə təltif edilib.

 

Akif AĞAYEV,
jurnalist-publisist,
MASALLI.