Ermənistanın hibrid müharibəyə keçməsi barədə məlumatlar daxil olur. Adətən ölkələr müharibəni uduzduqda asimmetrik və hibrid müharibədən istifadə edirlər.
LEQAL.AZ xəbər verir ki, bu sözləri noyabrın 3-də keçirilən brifinqdə Prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev söyləyib.
Prezidentin köməkçisi bildirib ki, Ermənistan Azərbaycanın mülki əhalisinə atəş açmaqda davam edir, bunun üçün qadağan edilmiş ən güclü silahlardan istifadə edir. Ermənistan asimmetrik müharibə, yəni terror vasitəsilə müharibənin aparılması üsulunu seçib.
Hikmət Hacıyev Ermənistanın öz əməlləri ilə digər ölkələri də müharibəyə təhrik etməyə çalışdığını qeyd edib.
