(Əli Rzazadədən Şəhid Teymur Abbaslıya ithafən)

Denən görüm necəsən,

Necə çatdın arzuna?

Necədir ölümsüzlük?

Döndün dan ulduzuna.

***
Necədir, Cənnət bağı,

Necədir, laləzarlar,

Sən gedəli, il olmuş,

Doğmalar sənsiz ağlar.

***
Sən gedəli, ağaclar,

Çiçək açmır həyətdə,

Sən gedəli, uşaqlar,

Daha qaçmır həyətdə.

***
Sən gedəli, dəyişib

Göy səmanın rəngi də,

Adam bilmir neynəsin,

Sənli günü ləngidə.

***
O sənli küçəmizin,

Xoş sədası kəsilib,

Dik duruşlu çinarın,

Sənsiz beli əyilib.

***
And içdin: “dəyişmərəm

vətəni, Cənnət olsa..”

Sən vətəni Cənnətə

Dəyişirsənmi yoxsa?!

***
Saatlar, günlər donur,

Hər baxdıqca şəklinə,

Gözlərindən oxuram,

Nə gəlirsə dilinə.

***
Deyirsən: “Cənnətdəyəm,

Andım da yadımdadır,

Cənnət dediyin məkan

Vətənin altındadır!”

***
Denən görüm necəsən,

Necə çatdın arzuna?

Necədir ölümsüzlük?

Döndün dan ulduzuna.


Müəllif: Əli Rzazadə